<< 呢一代>>
(好似唔係幾耐之前，我仲係屬於呢一代，原來個世界轉得好快，我已經逐漸變成上一代 ...)
曾經打過多過一份工嘅打工仔，想問你哋係exit interview嘅時候，對份工，對上司，對公司嘅制度不滿，你會唔會喺 exit interview嗰個場合，好似宿便一筆消咁，講哂出嚟呢？
屈指一算，連埋暑期工，大大話話我都已經喺十幾間公司打過工。正如朋友同我講：你真係冇嘢叻，最叻就係辭職。每一次辭職，俾人問你點解要resign, 我都好想作一篇論文，詳述公司有咩問題，上司有咩問題，心入面有好多說話，想盡訴心中情。但每一次都會欲言又止，通常我會覺得，點解我要益咗你？點解我要教精你？作為一個離職嘅員工， 臨別秋波，仲要令間公司進步？ 以前走嘅仆街同事，都冇為後人嘅利益而出聲，我又使乜嘢多此一舉？ 點解要為仲留返喺度嘅仆街同事爭取利益？睇住佢哋繼續俾仆街公司嘅制度摧殘，仲心涼啦。冇錯，我就係一個唔夠善良又自私嘅舊同事。 除左自私，又覺得搵第二份工可能要之前嗰份工嘅reference, 有機會食回頭草，說穿就係又自私又驚青，又有私心。
最近我發覺原來職場上嘅 freshman, 同我呢啲資深嘅small potato, 喺心態上已經有好強烈嘅轉變。 呢個世代轉變，可能受到而家呢個社會氛圍感染：有乜嘢就拎出嚟講 …. 受到壓榨要抗爭 ….. 以前錯唔應該俾佢繼續錯 ..,,老屎忽講嘢唔啱嘅時候，其實唔使俾面同尊重
以前我曾經喺討論區見過，有人話去公司interview等得耐，覺得間公司冇誠意，於是applicant 自己主動走人。我亦有見過，而家嘅freshman對於公司制度唔滿意，會主動集合多人意見，寫呈請書上告，列出有乜嘢不滿，對上司作出要求。在我而言， 我呢啲9 hea 打工仔，覺得「出聲嘅後生打工仔」真係好認真咁打工，我唔會對一間冇期望嘅公司提出訴求，又或者我有太多盤算，覺得啲仆街老細會覺得提出嘅人係搞事，會懷恨在心，你提出乜嘢要求，佢哋會用個小氣簿記低，唔炒你都會用其他嘅手段整蠱你，令你更難受。
經過呢班新入場嘅打工仔「出聲」，我發現其實提出申訴 opportunity cost係比我想像中低好多，首先呢班新入場嘅打工仔人工就唔高，即使佢提出申訴，老細好不滿炒咗佢哋，佢哋都好輕易可以搵到差唔多咁差嘅工作。 其次，如果個老細係唔鍾意佢哋，提出申訴，老細唔會對佢哋改觀，喺負值上面再減幾分，其實分別唔大。如果個老細係鍾意呢個後生仔，提出不滿，老細可能會覺得另眼相看，覺得後生仔有guts, 對工作上心提意見。
exit interview 將自己嘅不滿講出嚟，驚影響到之後搵工嘅reference … 老實講，我做過十幾間公司，從來都未試過食回頭草。我又唔係做特首，舊公司reference 對我嚟講，唔係真係好重要。
嗰日我喺一個天橋底，見到一個graffiti ,上面寫住功在當代，利在千秋。出聲可能冇用， 但如果exit interview 嘅意見影嚮到一兩個人， 令到之後入場嘅後生冇咁難受，都好呀。
世界真係變了樣，有朋友問：如果你而家係中學生，你會唔會做衝衝子，如果你係而家啱啱入職嘅職員，你對公司有不滿，會唔會提出 …
我覺得呢個世界好玩嘅地方就係在於，呢個世界係冇如果，有啲事只會係嗰個年代嘅人先至會做，如果我係呢個年代嘅人，我根本上就唔會諗，唔會盤算，我就已經行動咗喇。
我冇話邊一代比較優越，只係我哋嘅社會要交畀最新嗰代， 最新嗰代就係習慣提出，反抗，申訴。咁上幾代就必須要接受，磨合，適應。如果唔係，我地就會終於呢一代。
Search